09.02.08

The Heptones & BDF

Atala(k): Zuzenean! 2008 Iraila 2 @ 15:41 Egilea oleaktiff

Aste Nagusian ikusitako kontzertuetatik bat nabarmendu beharko banuke, azken zapatuan ospatutako hau izango litzateke. Beste batzuk be egon ziren (Ibon Koteron, Mykal Rose…), baina Bilbao Reggae Splashen edizio barri honek merezi du aparteko iruzkin bat. Izan be, bertoko reggae zaleontzat kristolango sentsazioa da Plaza Barriko agertokian Heptones moduko “behi sakratuak” Basque Dub Foundation ekin batera ikustea.

BDF talde mutante bat da, zeinetik partaide asko pasatu diren azken hamarkadan, baina beti pertsona berak zuzenduta: Iñaki Yarritu bilbotarra, zuzenekoetan baxua eta melodikaz arduratu baina estudioan konpositore eta ekoizle lanak be burutzen dituena. Beste egunean Bilbora ekarritako formazioan aurpegi berriak nabarmentzen ziren: kitarra jole poloniarra, azken orduan topatutako bateria, Akatz bakiotarrei fitxatutako haize sekzioa… esan bezala, talde mutante bat liderraren kontzeptuaren zerbitzura.

Kontzertua sendo batez gozatzeko aukera izan gendun. BDF-k backing band moduan duen gaitasuna eta indarra hasierako pieza instrumentaletatik nabarmendu zan. Eta horri jamaikar abeslari bikotearen inplikazioa, piezen hautaketa ona eta publiko beroa gehitu ezkero… argi dago ekuazioaren emaitzak positiboa behar duela izan.

Nabarmentzekoa Leroy Sibbles-en figura: ahotsa momenturik gozoenean euki ez arren, bere jarrera eta klaseari esker kontzertu on bat egitea lortu zuen. Holako figurei eskenatokira neskak igotzea be parkatu behar zaie… Hori bai, kontzertuaren amaiera ez zan ondo geratu. Agian larregi luzatu ziren, eta azkenerako ez zen bisak eskatzeko fuellerik geratzen publikoan. Badakigu batzutan antzerki apur bat (”do you wanna more heptones??” “yes??”) beharrezkoa dela publikoa jarrera entusiastetara bideratzeko. Baina eraberean, ez dit harritzen BDF holako topiko eszenikoetatik aldentzea.

Edozein modutara, kontzertu gogoangarri bat, bat horixe. Aste Nagusiko antolatzaileak, faborez, jarraitu Reggae Splash Plaza Barrian programatzen!!!

Lotura iraunkorra Iruzkinak

09.01.08

Berpizteko garaia…

Atala(k): Sailkatugabeak 2008 Iraila 1 @ 16:28 Egilea oleaktiff

Abuztuko oporretan hau eta bestea egiteko promesak zein arriskutsuak diren konturatu naz… nahiz eta denbora gehiena etxe inguruan emon, badirudi Barbados inguruan edo ibili nazela, burua ohiko jardun eta beharretatik hain urruti…

behintzat, indarrez berpizteko balio dezala!

Lotura iraunkorra Iruzkinak

07.30.08

Spraikada 08: zenbait zertzelada

Atala(k): Sailkatugabeak, Zuzenean!, Iruzkinak 2008 Uztaila 30 @ 13:56 Egilea oleaktiff

Nire tradizioari fidela izanez, parte hartutako ekitaldi baten ingurukoak 10 egun beranduago idazten jarri naz. Badakizue, oporrak baino lehen eskegita dauden ahalik eta kontu gehien finikitatu beharra…

Erandion ospatutako spraikada ‘08k irudi asko utzi dizkit buruan bueltaka. Egia esan, eta ez da dohako bonboa emotearren, graffitien kontu hau beti iruditu izan zait kuriosoa. Ilegalitatearen mugan kokatzen den kultura kaletarra, mundu osoan komuna den kode estetiko bat izan arren tokian tokiko enfokearekin landu daitekeen disziplina askea… askorentzat ganberrokeriak izan arren, graffitiok sakonki inpresionatu dezakete sentsibilitate estetiko minimoa duen pertsonea. Azken baten, aurtengo lehiaketako partaide baten lanak adierazten zuen moduan, Paleolito garaiko kobetako artearen bertsiorik modernoenaren aurrean geundeke…

Egia esan, gozada bat izan zen lehiaketarako hautatutako finalistak lanean ikustea. Batzuk taldelanean, besteak bakarrik, 8 - 9 ordu inguru horma zurietan spraikada bitartez ideia, mezu, unibertso… propioak marrazteko ahaleginetan. Uztaileko hondartzako egun itzel batek suposatzen duen arriskurekin, bai partehartzaileen osasunari zein publikoaren presentziari dagokionez.

Konplemento moduan hor ibili ginen eguneko programa apurtxo bat betetzen zenbait jarduera eginez: graffiti, breakdance eta dj tailerrak (aurreko mezuan dj tailerreko eszenatxo bat ikusi daiteke), eta arratsaldean graffitia eta musika batzen zituen performancea TTP  bikotearen eskutik.

Konkretuki, Piruk eta Pelik antolakuntzako Amaiaren Astra zaharra goitik bera bermargotu zuten, nabarmentzeko moduko selekzio musikal batez lagunduta: hasieran reggaean oinarritutako bariante desberdinekin, aurrerago bootleg katxondo mordoa erabilita. Nabarmentzekoa zati instrumentaletan sartutako euskerazko esaldiak (Atxagaren hitzaldi sorta batetik aterata!), asuntoari halako mistikotasun eta traszendentzia bat emoten ziotenak…

Laburtuz: Erandioko kaleen pasaia eraldatu duen holako ekitaldi bat gura neuke nire herrian!!

Lotura iraunkorra Iruzkinak

07.18.08

Spraikada!

Atala(k): Zuzenean! 2008 Uztaila 18 @ 14:32 Egilea oleaktiff

Azken urteotan gertatu izan den moduan, Topagunekoek EHko graffiti lehiaketa antolatu dute. Aurten Erandion izango da, eta programazioan beste adierazpide batzuk ere euren txokoa izango dute. Zerbitzari hau turntableen mundua, pintxatzearen ingurukoak alegia, erakusten saiatuko da. Goizean tailertxo bat espontaneo eta kuriosoek biniloa ukitu, marratu (jainkoarren, ez!), probatu… dagien; eta arrasti amaieran, Zarauzko artista batzuk egingo duten performance grafitero - musikalaren ostean, sari banaketari musika jarriko dion sesiotxo bat.

Dana dala, eguneko protagonistak spraidunak izango dira. Goizean goiz hasiko dira lanean, eta ia aurreko urteetan moduan (goiko argazkia, horren froga) lan ederrak ikusterik daukagun… ziur baietz!

Lotura iraunkorra 2 Iruzkin

07.17.08

Udako mixtapeak I

Atala(k): Material beroa 2008 Uztaila 17 @ 13:53 Egilea oleaktiff

Internet eta musika eskutik doazenetik, udaren aitzakiaz egindako mixtapeak oso ohikoak bihurtu dira. Uztaila heldu eta hortxe, blog, webgune, myspace etabarretan artista ezagun zein ezezagunek egindako nahasketa udatiarrak, rollo karibear edo ibizenkoa iradokituz, estiloaren arabera. Azken baten, orain urte batzuk telebistan iragartzen ziren Verano Mix, Caribe Mix eta gainontzekoen tokia hartu dute jendeak modu askean atondu eta eskuragarri jartzen dituen nahasketek. Askoz be interesgarriagoak eta dohainik ganera…  Hau aurrerapauso kultural bat ez bada, Jainkoa bajatu daitela bere begiekaz ikustera!!

Aurten momentuz ez dot gauza askorik aurkitu, baina topatutakoa behintzat nahiko beroa dela esan daiteke. Adibidez, DJ C amerikarraren sesiotxo hau. DJ/rupture eta antzekoen ildoa jarraitzen duenez, amerikar honen materiala bassy-a, dubby-a, zikina eta eskuluzea (besteen materialaz jabetzeari dagokionean) izango dela segurua da. On egin daizuela…

DJ C - “B-Low mix”

Lotura iraunkorra Iruzkinak

07.07.08

Uztailak 7… The Bug!!

Atala(k): Sailkatugabeak 2008 Uztaila 7 @ 15:58 Egilea oleaktiff

 Ba bai. Gurean zezenen inguruko aipamenak nagusi diren egun honetan, nik Kakarraldoaren ganeko aipua egingo dot. Izan be The Bugen azken lanak gaur ikusi du argia ofizialki, Ninja Tune zigilupean. Eta egunotan Iruñea lau hankatara eta adarrekin dabilen faunak hankazgora jartzen duen bezala, Kevin Martinek labezomorroz beteriko Londres apokaliptiko bat irudikatzen du bere musikarekin.

Bere aurrekaria izan zen “Pressure” mitikoaren argitalpenetik 5 urte pasatu eta gero, ragga, breakcore, dub eta abarrez osatutako koktela inoiz baino gogorrago eta dantzagarriago dator. Aurreko diskoa pieza astun eta lasaietan antzeko proportzioan zatituta bazegoen, oraingo honetan pieza bilduma osoa biziagoa, gogorragoa eta ilunagoa den sentsazioa daukat. Hori da behintzat Sarean entzun ahal izan ditudan aurrerapen - zatiek emandako lehen inpresioa, LP bikoitza lortu aurretik tximinoa kentzeko daukadan modu bakarra… Entzun!

The Bug feat. Tippa Irie - “Angry”

The Bug feat. Warrior Queen - “Insane”

Lotura iraunkorra Iruzkinak

07.01.08

20 urtez ganbaran gordeta

Atala(k): Sailkatugabeak 2008 Uztaila 1 @ 17:27 Egilea oleaktiff

Oroitzapen batzuk ganbaran ahaztutako trasto zaharrak modukoak izan ohi dira, kaxa bat zabaldu eta hor agertzen dira, hautsak janda eta gitxien espero zenituenean, zure iraganaren lekukoak.

Antzeko zerbait gertatu zait egunotan Robert Mugabe Zimbabweko presidentearen inguruan sortutako zalaparta dala eta ez dala. Asko dira politikari ilun honen kontra altxatu diren ahotsak, sonatuela Nelson Mandelaren gaitzespena izan delarik. Nelson Mandela aipatze hutsak ostera, ahaztuta neukan errekordu bat ekarri dit burura : 80 hamarkadaren amaieran, artean ume bat nintzela, ETBn ikusitako bideoklipa, Nelson Mandela bera ardatz zuena. Aurkezlearen berba batzuk gogoratzen nituen (“tipoak bizitzaren zati handi bat kartzelan pasatu ostean..”), baita bideoaren 80’s estetika, baina beste edozerren gainetik neska baltz batzuk botatzen zuten estribilloa neukan gogoan: “Freeeeee Nelson Mandelaaaaaaa”…

Zorionez ikusentzunezko arkeologiaren urrezko garaia bizi dugu Youtube modukoei esker, eta abestia lehenengo ahaleginean topatu dot. Autorea, ezagun zahar bat: Special AKA, The Specials talde mitikoa desegin ostean Jerry Dammersen proiektua izandakoa. Hori bai: ia ia beldurra emoten dau orain 20 urteko oroitzapen puntual bat (bideoa behin bakarrik ikusi nuen!) eta errealitatea zeinen antzekoak izan daitezkeen ikusteak…

Lotura iraunkorra Iruzkinak

06.27.08

Alperkerie

Atala(k): Zuzenean! 2008 Ekaina 27 @ 16:00 Egilea oleaktiff

XIX mendeko marrazki bitxi horretako pertsonaien moduan egon naz azken 20 egunetan musika asuntoari - eta batez be blogari - dagokionez, laugarren pekatu kapitalean erabat galduta. Harritzekoa, bestalde, inoiz baino post potentzial gehiago etorri jatazalako burura. Baina deabrutxoak gogoa moteldu eta erlojuaren orratzak aurrera bidaltzen oso fin ibili dira…

Agian Eibarko sesio maratonianoaren ondorioa izan da. Definitiboki, holako 20 hour party -ak ez dira gomendagarriak osasunarentzat: goizetik iluntzera herriko euskal jaiean txuflainak  joten ibili ta gero, hartu 50 kilo material eta egizu 5 orduko sesioa… klaro, goizaldeko 6etan, etxera bueltan, noizbait bolantean lo hartu izan duen jendea ulertzera heldu nintzen.

Dana dala, behar nuen holako suzko froga batetik bizirik irtetzea. Azkenaldian eukitako konpromisoetan ez dot behin be denbora luzez pintxatu, eta 5 ordutan jenero batetik bestera, tabernan dagoen jendearen animoak jarraituz disko maletari zuku guztia atara behar izatea… euki beharrezko esperientzia da dj batentzat. Izan be, antzeko kontestu baten kristolango zaplastekoa hartu nuen nire lehen dj sesioan, orain hiru urteko zapatu gau baten, Arrasateko Etxoste tabernan. Nire break, dancehall eta jungle anabasa primitibo eta lotsatia technozaleen oihu eta irainen artean (”dj muertoooo!” “no tienes techno - house??”) ito zan, eta panorama horren aurrean tabernako tipoak limosna bat eta sukaldean “tiro batzuk” (!!)hartzea proposatu zidan, platoak bakean uztearen truke. Joder, zelako estrenoa… hori bai, ekaitzik gogorrenean be esperantzak bere momentua izan ohi du: tipo pare bat kabinara agurtzera etorri ziren, jarritakoagatik zoriontzera.

Bat primeran gogoratzen dot, Felipe, eibartarra. Beste eguneko sesioan ez zan agertu edo, hobeto esanda, bat baino gehiago agertu ziren: South Rakkasen erritmora ipurdiak mugitu zituen kuadrila, Steel’an’skin-en “Afro punk reggae dub”egatik galdezka etorri zitzaidan Gurutze tabernaria, edota  The Clashen “Mustapha Dance”ekin txaloka ibili ziren mozkorrak… Eibar, toki interesantea, bai horixe…

Lotura iraunkorra Iruzkinak

06.06.08

Bar Bost - Reggae showcase

Atala(k): Sailkatugabeak 2008 Ekaina 6 @ 16:02 Egilea oleaktiff

Bai, irudi honek irakurketa bikoitza dauka. Judahren lehoia, reggae sesioagatik, baina baita  “lehoi” tasa altuena duen Gipuzkoar herrian dalako enkargutxoa. Zapatu honetan, Bost tabernan, Jamaikar musika saio luuuuze bat agindu didate…

5 orduko sesio baten pisua binilotan neurtu ezkero, ba kiloren bat edo beste urteten da. Hortaz, selekzioan dago gakoa, eta nire maleta jadanik sutan dago, zer eroan ta zer ez aukeratzeko dilematan. Reggae, dub, dancehall, ragga, drum’n'bass, dubstep… formula noraino luzatu daitekeen ikustea oso interesantea izango da. Hau da, jenero purutik aldentzen noan neurrian ze puntutaraino jendeak onartuko duen “reggae”a jartzen ari nazela, noz hasiko diren bekainak okertzen eta lepoak luzatzen…

Baina ez gaitezan okerrenean jarri. Publiko “selektoa” dala entzun dot. Ia aho zapore ona izteko gai nazen.

Lotura iraunkorra Iruzkinak

06.05.08

Portishead - The Rip

Atala(k): Iruzkinak 2008 Ekaina 5 @ 15:48 Egilea oleaktiff

Aldatuta itzuli dira, eta ez dakit horren aurrean zer pentsatu. Ez dakit apurketa disko honetara heltzeko urte guzti hauek behar izan ote dituzten, edo azken unean lortutako soluzio bat izan den beraien karikatura izaten ez bukatzeko. Izan be, gogorra izan behar da momentu batetan rollo baten aitzindaria izan eta zure atzetik moda jarraitzen duen talde eta kazetari tropel bat sortzea, eta momentu baten hauek (batez ere bigarrenak, medioak) nazkatu (hain gogaikarriak omen dira hemen eta han errepikatzen diren klixeak!!) eta zure estiloa, zure formula, bat-batean erabat demodé geratzea.

Hortaz, duela 15 urteko iturria guztiz sikatu denean, aurrera egitea besterik ez da gelditzen. Eremu ezezagunetara. Noiz edo noiz estropezu egin eta zerotik berriro hasi behar arren. Garai bateko grabazio teknika eskisitoak alboratu eta grabaketa apropos zikintzera heldu behar izan arren.

Batzuentzat emaitza larregi aldenduko da espero zutenarekiko. Beste batzuk irregularra izatea aurpegiratuko diote, posible zela zortzi urtetan zerbait borobilagoa egitea. Eta egongo da lan berria harribitxi kategorian jarriko duenik ere, medio batzutan beraien aldaketa ze ausarta izan den nabarmentzen dutela ikusi ostean, klaro.

Eta nik… nik ez dut garbi eukiko zer esan. Orain arte aipatutakoaren nahaste bat, agian. Dakidana da disko barriko abesti honek eta bere bideoak harrapatuta naukatela. Gozatu…

Lotura iraunkorra Iruzkinak